Marea beltzak

Tarteka, marea beltzek kostaldea tindatu eta hondamendi ekologikoa eragiten dute. Itsas bizidunak hil eta ehunka lagunen ogibidea kolokan uzten dute. Azkeneko hilabeteetan bertatik bertara ikusten ari gara hori.

Hala ere, marea beltzak ingurumenari eragiten dioten jarduera-multzo baten adibidea besterik ez dira, izotz-mendiaren gailurra. Izan ere, petrolioaren industriaren baitan, ingurumenean arrastoa uzten duten jarduera asko dago, istripurik gertatzen ez bada ere. Adibidez, petrolio gehiago isurtzen da itsasora ontziak zamatu eta hustean, edo garbitzean.